Фронт 21/42 е непрофитна, невладина, еколошка организација, регистрирана како Граѓанско здружение во Јануари 2005 год.
Организацијата се роди во Декември 2004, во едно студено утро (некаде околу 3 часот по полноќ), по долга и инспиративна дискусија на тема какво ни е општеството и какво би сакале да биде, во моментот кога сфативме дека НИЕ МОЖЕМЕ ДА НАПРАВИМЕ НЕШТО ВО ВРСКА СО ТОА!
Во дискусијата учествуваа 6 непоправливи идеалисти и нивната енергија и визија неполн месец подоцна се претвори во нова организација.
Од Јануари 2005 отворивме Фронт за борба против деструкцијата врз природата, на географските координати 21 и 42, планетарната адреса на Скопје, градот во кој сме родени и живееме.
Фронт 21/42 ја израснавме како свое дете и денес брои 18 членови, има своја канцеларија и директно соработува со голем број домашни и странски организации.
Од август 2006 Фронт 21/42 е Партнер организација за Македонија на International Friends of Nature, со седиште во Виена, Австрија, а од јануари 2007 асоцијативна членка на Јustice and Environment, Европска мрежа на организации за еколошко право . |
Ултимативната мисија на Фронт 21/42 е хармонизација на општеството со природата.
Целите кои ги зацртавме за остварување на оваа мисија се:
- борба против климатските промени;
- одржливо искористување на природните ресурси;
- зачувување на биодиверзитетот;
- подобрување и спроведување на еколошка легислатива;
- афирмација на прогресивни светски еколошки трендови;
- поврзување и заедничко дејствување со домашни и меѓународни организации и индивидуалци за остварување на овие цели.
Методи за остварување на целите:
- конкретни акции;
- едукација;
- јавни кампањи и настани;
- советувања;
- лобирање и застапување.
Мотото кое не води од самиот почеток е древната индијанска поговорка „Ние не ја наследуваме Земјата од нашите родители – туку ја позајмуваме од нашите деца" |
